Sapo ka përfunduar Universitetin e Arteve dhe emri i tij ka zënë vend mes kastës së përzgjedhur të aktorëve të serialit “Familja Kuqézi”. Mbase as vetë Erini nuk e kishte përfytyruar një sukses kaq të shpejtë, por i riu ka spikatur me rolin e Fatjonit, djalit të shtëpisë.
“Jam jashtëzakonisht i lumtur. Në një realitet tjetër, do ta kisha blerë këtë përvojë,” – shprehet djali tek i cili talenti për artin dhe aktrimin nuk vijnë rastësisht.
Nëse nuk e keni vrarë ende mendjen për të kuptuar se çfarë ju thotë mbiemri i tij, ju tregojmë se Erini është djali i Fadil Kujofsës, aktorit të shquar të kinematografisë shqiptare dhe Teatrit Kombëtar, Cukut të famshëm të filmit “Dy here mat”.
Kur sheh Erinin, nuk e ke shumë të vështirë të kuptosh se Fadil Kujofsa është babai i tij, sepse i ngjan shumë. “Jam i lumtur që i ngjaj fizikisht babait, sepse ne njerëzve, pasi nuk jemi më në këtë botë, na mbeten vetëm kujtimet dhe ky është një kujtim shumë i mirë për mua, që ta mbaj gjallë në fytyrën time.
Edhe kur eci e ndiej që eci si ai, hundën e kam si ai dhe shpresoj shumë që përveç fizikut, t’i ngjaj edhe si aktor.
Objektivi im është të jem sa gjysma e tij, sepse tani jam në gjendje ta vlerësoj se sa i mirë ka qenë ai teknikisht,” – rrëfen Erini, teksa sjell kujtimet e babait të tij të ndjerë, ndarë nga jeta pesë vite më parë.
Përveç ngjashmërisë fizike që ka marrë nga i ati, Erini ka mundur ta ushqejë shpirtin e tij si artist i ardhshëm, prej një burimi shumë të pasur, ndaj ishte e pamundur që të mos influencohej për drejtimin që do të merrte në jetë.
“Ne fëmijët e familjes sime – motra e madhe Lisa, motra e dytë Ani dhe unë – jemi rritur me teatrin. E njoh gjithë kastën e vjetër të aktorëve dhe kjo ka ndikuar që të jem sot këtu.
Para se të futesha në Universitetin e Arteve për aktrim, babai më bëri një pyetje shumë të sinqertë: ‘Je i sigurt që do të vazhdosh këtë shkollë?’, duke marrë parasysh gjithmonë faktin se sa e vështirë është të jesh artist këtu në Shqipëri dhe se fitimet nuk do të jenë kurrë të mjaftueshme për të mbajtur një familje.
Sigurisht që u mendova gjatë dhe thashë ‘po’.
Një arsye ishte që doja të shprehesha dhe të çlirohesha në skenë, sepse në jetën e përditshme nuk ke mundësi ta bësh, kurse arsyeja tjetër ishte se nuk doja që në një të ardhme, ndoshta kur të isha i ulur në një zyrë, të thosha ‘ah, si nuk e bëra atë që doja’”.
Unë besoj se ka edhe një arsye të tretë që qëndron heshtur brenda Erinit: qoftë në skenë apo para kamerës, djali do që të mbajë zgjuar kujtimin e të atit, Fadil Kujofsës, i cili i ka trashëguar të birit gjenet, por edhe një familje, që e mbush me dashuri.
“Nëse do të thosha se çfarë më mungon nga im atë, tani do të doja vetëm ta përqafoja fort. Unë humba një shok, megjithëse ime më vazhdon të ma mbushë jetën me dashuri, – vijon të rrëfejë Erini. – Jam shumë i lidhur me nënën.
Ajo është një yll, është shumë e bukur. Është frymëzim i madh për mua.
I bëj vazhdimisht dhurata, pa shkak, vetëm për t’i shprehur dashurinë. Me dashurinë e saj, ma zëvendëson pak mungesën e babait.
Kam edhe dy motrat Lisën, e cila është gjithashtu aktore dhe motra tjetër, Ani, që ka studiuar për Administrim Biznesi.
Ajo është e vetmja që i ngjau mamasë dhe sa mirë bëri. Kjo sepse ajo na mban neve me para,” – thotë Erini dhe qesh.
Kështu është ai, tërë kohën, gjatë xhirimeve, para dhe pas tyre. Nuk e kupton dot se kur është momenti kur e shkëput fillin nga vetja dhe lidhet me personazhin e Fajtonit, të cilit duket se i ngjan shumë.
“Në fillim kisha vështirësi me personazhin, sepse të duket sikur duhet t’i ndërtosh të gjitha ato që personazhi ka kaluar më përpara, informacione që nuk i ke që në fillim, por me kalimin e episodeve zbulon të kaluarën e tij dhe mësohesh me të. Pastaj fillon dhe jeton me të, fut edhe gjëra nga vetja dhe kështu, automatikisht bëhet më e lehtë.
Ti fillon të jetosh dhe të mendosh si ai,” – përfundon rrëfimin Erin Kujofsa./Vjosa.net
ObserverKult
Lexo edhe:
FADIL KUJOVSKA, AKTORI QË I DHA BUZËQESHJE SKENËS DHE EKRANIT
Askush nuk e harron dot personazhin “Cuk” te filmi “Dy herë mat”, një punonjës i thjeshtë, i mirë dhe buzagaz që nuk ia prishte shefit të tij Aleko Prodani, titullar në Sarandë, ku zhvilloheshin ngjarjet e filmit.
Ky personazh i luajtur mjeshtërisht nga aktori Fadil Kujovska, ka lënë gjurmë në memorien e popullit shqiptar.
Në kuadër të muajit të Teatrit, ministrja e Kulturës e Shqipërisë, Elva Maragriti, sjell në kujtesë aktorin e njohur të skenës shqiptare, Fadil Kujovska.
Ai i cili i dha buzëqeshje skenës dhe ekranit.
Tekstin e plotë mund ta lexoni KËTU:
ObserverKult
