11 MARS 1981
(Varianti i parë)
Në redaksinë e gazetës “Bota e re”
atë mbrëmje
ktheva prej mensës
Ishte revista poetike në TVSH
në nëntëmbëdhjetë e tridhjetë
Vinte vetëm zëri
po jo dhe pamja e Piro Malavecit
tek recitonte mendueshëm mbi male
Valët e asaj drite
sa shkyenin Bjeshkët e Nemuna
në qindra prita repetitorësh binin
E burgjeve të errta të mosparjes
përfundonin
Një guralec
fërfëlloi në dritare
e një dridhje e këndshme zemrës sime
Mos erdhi ajo
në këmbë brofa
Kur dola jashtë
një vrull i paparë rinie
marshonte drejt qendrës
Një pjatë si bisht dallëndysheje
stinën e pritur paralajmëroi
(11 Mars 2012)
PARALAJMËRIM I STINËS SË PRITUR
(Ngjarjeve të 11 Marsit 1981)
(Varianti dytë)
Një guralec fërfëlloi në dritare
e një dridhje e këndshme
zemrës sime
Mos erdhi Ajo
ç’ pret
Një mal mornicash
trupin ma drithëruan
Brofa në çast
hapa derën
Një pjatë
hapësirës së mbyllur
terrin e një nate shkyente n’ fluturim
Mbi kryeqendrën ngjyrë hiri
si bisht dallëndysheje
stinën e pritur paralajmëronte
Ajo do vinte
si s’ do vinte kur e prisja
Shpresën nuk e helmuan
as sjellësit e tymit me gas
as mig -ët tek fluturonin qiellit të nxirë
si sorrëshkinat në ikje me britmë
as dhe dhomat e akullta prapa udbës
në Prishtinë
Ajo
pas bishtit të çdo dallëndysheje
do kthehej për çdo stinë
me ëndrrën e vjetër
mbi shpinë
Të plotë ta rigjente Shqipërinë
( 11 Mars 2015 )
PARALAJMËRIM I STINËS SË PRITUR
(Ngjarjeve të 11 Marsit 1981)
– Varianti III –
Një guralec fërfëlloi
në dritare të redaksisë “Bota e Re”
në Qendrën e studentëve
midis Prishtine
teksa po ngrysej një ditë
e s’po zbardhej nata
nga pesha e pamatshme e territ
Një dridhje e beftë
ma përshkoi zemrën
Sa fola gati në zë
Ai çast i pritur
apo shenja e ardhjes së Saj
po i shpërgjumë muret e palëvizshme
Brofa në çast e dola
barit të saporingjallur
për ta përqafuar
stinën e ëndërruar kahmot
Një pjatë
hapësirës së mbyllur
shqyente terrin që kish pllakosur syve tanë
n’ fluturim
Mbi kryeqendrën ngjyrë hiri
si bisht dallëndysheje
stinën e pritur paralajmëronte
Ajo do t’vinte
si s’do t’vinte
kur e prisnim me pa durim
Shpresën tonë nuk e helmuan më pas
as sjellësit e tymit me gas
as mig -ët që fluturonin ulët
qiellit të nxirë me emër Kosove
si sorrëshkina në ikje plot britmë
as edhe dhomat e akullta
prapa Udbës në Prishtinë
Ajo pjatë shprese
s’pushoni së fluturuari
pas bishtit të çdo dallëndysheje
që kthehej secilës pranverë
me ëndrrën e vjetër
mbi shpinë…
…bëjeni të plotë Shqipërinë
(11 Mars 2015 – 11 Mars 2026)
ObserverKult
Lexo edhe:
Në bibliotekën “Hivzi Sulejmani” u mbajt takimi me shkrimtarin, Sabit Rrustemi
