Libri “The Lil’s Poem” i Halil Matoshit, botuar nga Shtëpia Botuese “Littera”, është vlerësuar si libri më i mirë në Mitingun e Poezisë në Gjakovë.
Në organizim të Klubit Letrar “Gjon Nikollë Kazazi”, dje u mbajt edicioni i 59 – të, i Mitingut të Poezisë. Përveç prezantimit të “Antologjisë shqip – greqisht i poetëve të Gjakovës” përgatitur nga shkrimtari e përkthyesi Iljaz Bobaj, në orën e madhe letrare poezitë e tyre i lexuan 15 poetë.
Në fund të këtij festivali poetik juria e klubit letrar “Gj. N. Kazazi” ndau këto çmime:
– Çmimi “Din Mehmeti” për librin më të mirë të këtij mitingu, iu nda poetit të njohur Halil Matoshi për librin “The Lil’s Poem”, botuar nga Shtëpia Botuese Littera.
– Çmimi “Ali Podrimja” për poezinë më të mirë të lexuar në këtë edicion të 59 të, i takoi poetit Bekim Kelmendi për poezinë “Ëndërrime”.
– Çmimi “Yllka Domi” për poeteshën më të mirë debutante, i takoi poeteshës së re Fjolla Muhahaxhiri- Agusholli.
– Çmimi Ndërkombëtar “Nëna Terezë” që i ndahet poetit më të mirë të huaj që merr pjesë në mitingun e poezisë në Gjakovë, iu ndau poetit amerikan Bill Wollak.
Libri me poezi i Halil Matoshit “The Lil’s Poem”, botuar para disa muajsh nga Shtëpia Botuese Littera, është mirëpritur nga lexuesit dhe kritika.
The Lil’s Poem është prezentuar tashmë në disa manifestime kulturore, ndërsa promovimin do ta ketë në muajin nëntor, në Prishtinë.
Në vazhdim gjeni poezinë The Lil’s Poem, prej nga e ka marrë edhe titullin libri :
The Lil’s Poem
Poezia për vrasjen potenciale
nuk munet me pasë nji titull t’mirë
Po e quej thjesht Poema e Lilit
Më 21 maj 1999 nji dyzinë serbë
me uniforma blu
e menime të zeza
rrethuen sh’pinë téme
hapën dyer me shkelma kundakë
e shamje
siç nis çdogjâ në Ballkan
Bastisje e brimë
përmbysje orendish
dhe të secilës ide për njeriun
si qenie humane
Ishim të shpërqendruet
baba 84-vjeç i shihte në sy milicët
i patrazuem sikur tallej me kohët
që i ringjâlleshin
Nâna e shtangun
m’i kish ngulë sytë nemitun
si me pa dekën e djalit
Fëmijtë shikojshin armët e tyne
unë i shihja të gjithë
pak çaste para se me i masakru
me dilemën morale
që s’mujta me bâ asgjâ për ta
Grueja ajo mbante fëmijtë përdore
e herë tanë neve
si në nji valle të çmendun
në nji gropë
unë s’kisha kohë për vete
po e pajsha nji dramë
pa epilog
Mund të ishte Shakespeare-ane
ata mund të ktheheshin mrena!?
Mos e bâ Zo’
u mbyll dera e oborrit
më qitën jashtë
Nji revole me fyshekë napalmi
ma vùni mas kreje
mâ i riu p’ej tyne
“Jel si spreman” * m’tha serbisht
unë u bâna gati
Ai e shkrepi
e ndjeva po diqysh nuk bijsha
e unë e dijsha
që ato armë ishin të mbushuna
për ne plot nji shekull
“Krenemo” ** urdhnoi
at’herë e kuptova
se nuk i kish vù fyshekë
Mas meje metën njerëzit
e mi hala të gjallë
dhe tym i dendun me erë mishi
që dilte nga mbamendja
————
- “A je gati”
“Nisemi
Halil Matoshi (1961) asht poet, eseist, tregimtar, gazetar dhe publicist. Merret edhe me pikturë dhe studime filozofike e letrare. Ka diplomu në Fakultetin Filozofik, Departamenti i Filozofisë dhe Sociologjisë në Universitetin e Prishtinës. Ka një master në gazetari.
Ka punu gazetar, redaktor dhe kryeredaktor i revistave dhe gazetave “Bota e re”, “Zëri i rinisë”, “Zëri”, “Syri i tretë”, “Republika”, “Sheshi”, “Lajm”, “Gazeta Express”, “Focus”, “Koha Ditore”.
Asht në një mënyrë gazetbâmës.
Tri herë i shpallun gazetari ma i mirë në Kosovë, 1988, 2000 dhe 2004;
Katër herë i arrestuem nga regjimi serbian, gjatë Lëvizjës antifashiste (1990-1999);
Matoshi ishte i marrë peng gjatë luftës për Kosovën (1999) dhe asht mbajtun për një vit në kampet serbe të përqendrimit në Lipjan (Kosovë) dhe Požarevac (Serbi).
Asht autor i librave: “Udhëtim nëpër ëndërr të keqe” (1994), “Lajmësi memec” (1996), “Udhëtim nëpër zgjëndërr të keqe”, (2000), “Hija e Krishtit” (2004), “Katedrale prej letre” (2012), “N’zanafillë” (2013) dhe “Gdhendje drite”, (2021);
Poezi të tij janë përkthy në gjermanisht, spanjisht, sllovenisht, serbisht e kroatisht, turqisht, rumanisht, greqisht, anglisht.
Botimin e librit e përkrahu Ministria e Kulturës, Rinisë e Sporteve e Republikës së Kosovës.
ObserverKult
Lexo edhe:
“TË BURGUEMIT NUK THYHEN”/ CIKËL POETIK NGA LIBRI I RI I HALIL MATOSHIT
