Një enë bronzi e vulosur prej rreth 2.300 vitesh ka ruajtur brenda saj një zbulim të pazakontë, 3.74 litra të një pijeje alkoolike të lashtë, të ngjashme me birrën. Zbulimi është bërë nga arkeologët në varrezën Shanjiabao, në rajonin Ningxia Hui të Kinës, pranë një prej segmenteve më të vjetra të Murit të Madh. Ena ishte vendosur në një varr që daton afërsisht në vitin 221 para Krishtit, në periudhën e kalimit nga Shtetet Ndërluftuese drejt dinastisë Qin.
Kur studiuesit hoqën tapën prej pëlhure dhe argjile, brenda gjetën një lëng transparent me nuancë blu në të gjelbër. Analizat treguan se bëhej fjalë për një pije alkoolike të prodhuar nga drithërat dhe të fermentuar me një kulturë tradicionale të njohur si “qu”. Edhe pse është përshkruar si një lloj “birre e lashtë”, studiuesit sqarojnë se ajo ishte më e ngjashme me paraardhëset e pijeve tradicionale kineze me bazë drithërash. Ndryshe nga birra moderne, në prodhimin e saj nuk përdorej lupul.
Analizat e sedimentit zbuluan edhe përbërësit. Rreth 92% e kokrrizave të niseshtesë vinin nga meli, ndërsa pjesa tjetër kryesisht nga gruri dhe elbi. Drithërat mendohet se bluheshin dhe ngroheshin përpara fermentimit. Një tjetër element që ka habitur studiuesit është ruajtja e më shumë se 8.500 qelizave të majasë. Zbulimi u jep arkeologëve të dhëna të rralla mbi teknikat e fermentimit në Kinën e lashtë, duke treguar se prodhimi i pijeve alkoolike ishte mjaft i zhvilluar që 2.300 vjet më parë./gazetashqip
ObserverKult
Lexo edhe:
