Struktura të rëndësishme arkeologjike, janë zbuluar gjatë punimeve në sheshin “Çerçiz Topulli” në Gjirokastër. Mure fortifikuese mesjetare, gjurmë të qeramikës, materiale skeletore që sipas specialistëve i takojnë shek XVII fillim shekulli XVIII kanë dalë në dritë prej disa ditësh duke çuar ne pezullimin e përkohshëm të punimeve për projektin e Rilindjes Urbane në qendrën muzeale të Gjirokastrës.
“Një mur i lashtë që daton në shekullin XVI. Janë fragmente të një muri mesjetar me të gjithë elementët, ku një ndër kryesorët të këtyre mureve, që mund të jenë të kështjellave të vogla të asaj kohe, janë frëngjitë të cilat i ndeshim në këto kështjella Gjirokastrite si objekte të vëzhgimit dhe ruajtjes së objektit, drejtoria jonë ka ndaluar punimet”, tha Vaso Polo specialist në DRKK Gjirokastër.
Dosja me të dhënat e gjetura ka shkuar në Këshillin Kombëtar të Arkeologjisë i cili do të përcaktojë rëndësinë e zbulimit dhe masat që duhet të ndërmerren. Më herët janë gjetur në thellësi, puse mesjetare, por u mbuluan nga firma kontraktore që po kryen punimet.
Në bazë të projektit sheshi “Çerçiz Topulli” është konceptuar të jetë tërësisht për këmbësorët ndërkohë që do të ketë parkim të nëndheshëm./shqiptarja.com
LEXO EDHE: Gërmimet në Apoloni, zbulohen varrezat romake dhe furra 2500-vjeçare e qeramikës
