Nga Florian Binaj
Në këtë emision kemi sjellë një mori denoncimesh, hetimesh, raportimesh, jetëshkrimesh, dorëshkrimesh, dorëzimesh, gëzimesh, lumturimesh, hidhërimesh, përjetimesh, mashtrimesh, bashkimesh, tjetërsimesh, keqpërdorimesh e sa e sa imesh…
Fenomene që e deformojnë shoqërinë, marrëveshje në të mirë të disa njerëzve por që shkatërrojnë Shqipërinë.
Për çfarë kemi raportuar jemi përpjekur të gjejmë edhe përgjegjësit. Kemi treguar me fakte, me figurë e zë se kush janë abuzuesit.
Por, për të gjithë këto gjëra që nuk shkojnë mirë, ka dhe një përgjegjës për të cilin nuk flasim shumë:
Shqiptari që fle gjumë. Ai që sytë i ka hapur por që nuk do të shohë. Ai që lajmet që dalin nga investigimet tona i dëgjon, por nuk do që t’i kuptojë; ai që del në protestë për reality show, por nuk shqetësohet që për të gjitha taksat që i merren, nuk merr asnjë shërbim; ai që bëhet luftarak vetëm për termat Prind 1 e Prind 2, por është i shurdhër kur ne i tregojmë që thith ajër kancerogjen dhe që fëmijët e tij mund të rriten dhe pa prindër.
Madje nuk kanë as guximin që të ndihen keq për atë që i bën keq se kanë frikë se mos ndihen më keq…
Nuk po bëjmë thjesht një emision, ne po përpiqemi të hedhim dritë aty ku nuk ka guxim askush.
E kemi faktuar ujin e pisët që na shitet si ujë i pijshëm dhe na faturohet si shampanjë, kemi sjellë dëshmi për inceneratorët ose në shqip, hirëzuesit, kemi zbuluar trafikun e votuesve me ndryshim adresash, kemi zbardhur dhunimin e votuesve nga kryetarët e bashkive, kemi faktuar abuzimet me tenderat….e sa e sa të tjera.
Ne, Piranjat, duke e lënë modestinë jashtë dere, e themi me plot gojë e bindje që edhe këtë sezon kemi bërë punë të shkëlqyer.
Por, sfida jonë më e madhe nuk është me shurdhërinë e institucioneve e deri SKAP-it, më falni SPAK-ut, para denoncimeve tona, por mpirja e ndërgjegjes qytetare.
Qëllimi ynë nuk është thjesht denoncimi i së keqes, por zgjimi i shqiptarëve që flenë gjumë dhe që këto të këqija po e vrasin në gjumë…
Na kanë kërcënuar, na kanë paditur për të na trembur e për të na mbyllur. Janë përpjekur të na blejnë, bllokojnë, fshijnë, censurojnë..
Por ja ku jemi. Në opozitë me pushtetin, sepse ky është roli i çdo medie serioze.
Sezonin tjetër do të rikthehemi dhe më të fortë. Me më shumë guxim, sepse, Shqipëria ka shumë nevojë për atë që ne bëjmë: të bëjmë dritë, derisa të gjithë të zgjohen.
Shqipëria ku nuk do ketë më nevojë për Piranja, do të jetë Shqipëria prej nga askush nuk ikën e ku gjithkush do ketë dëshirë të jetojë dhe ku vlerat e vërteta të jenë prirëse të jetëve tona e demokracia dhe meritokracia të zënë rrënjë…
Derisa ta bëjmë këtë Shqipëri.
*Monolog i aktorit, në emisionin “Piranja” të drejtuar nga ai
ObserverKult
Lexo edhe:
MONOLOGU I FLORJAN BINAJT: TIRANA ËSHTË BËRË SI PLAÇKË, SI KËRMË TË CILËN TË GJITHË DUAN TA HANË…
Prezantuesi i emisionit investigativ “Piranjat”, Florjan Binaj monologun në emisionin e tij ia ka dedikuar Tiranës, kryeqytetit të Shqipërisë.
“Kokën nga Europa. Sytë nga Kabuli. Tirana, qyteti që prish çdo ditë memorien e qytetarëve të saj”. Kështu thotë Binaj duke iu referuar asaj që po ndodh në Tiranë.
Nga pikëpamja urbanistike ku më shumë i ngjason Kabulit. Më shumë se sa një qyteti gjeografikisht pjesë e Europës.
Tekstin e plotë mund ta lexoni KËTU:
ObserverKult
