Reagim ndaj rishkrimeve të Albanologjisë nga diletantë që në çdo 5 fjalë shajnë akademinë dhe mburrin “studimet” e tyre antishkencore!
Nga Muharem Jakupi
Asnjë akademi, sado e dobët apo e vogël, nuk ka për detyrë apo detyrim të merret me sherre të përditshme me amatorët e rrjeteve sociale, shpesh edhe me diletantët, delirantët, krejt të paditurit etj., të cilëve çfarë nuk u punon fantazia, sepse në rrjet gjendet seti i plotë i larmisë!
Akademitë nuk janë gjithologji dhe as neurotike që natë e ditë të shohin ëndrra me sy hapur për të deformuar/ndryshuar Homerin e krejt helenistikën dhe të vendosin me zor lidhje gjenetike të shqiptarëve me pellazgët. Akademitë merren me çfarë del nga përpunimi i thellë shkencor i fakteve dhe të dhënave të tjera të sigurta, punë të cilat i bëjnë me programe dhjetëravjeçare apo shekullore, prandaj edhe me ngadalësinë e pashmangshme të kujdesit dhe sigurisë dhe me pjekje të kontrolluar të konkluzioneve që mund të duket se dalin në/nga hulumtimi i një fushe kërkimore të caktuar. Akademitë, si rregull, angazhojnë/përfshijnë edhe punën shkencore kolosale të profesorëve të universiteteve. Nga ana tjetër, akademitë nuk kanë dot në dispozicion 1/2 e buxhetit të shtetit dhe 1 milion studiues dhe të merren, e me çfarë, vetëm me helenistikë, pasi albanologji kjo që po ndeshim gjithandej nuk është?!
Zonja dhe zotërinj, të matur dhe të çartur, çështjet e helenistikës, më shumë se çdo çështje tjetër e antikitetit a prehistorisë, në përgjithësi, praktikisht tashmë është pak çështje e grekëve, egjiptianëve, iranianëve etj. dhe SHUMË çështje e të gjitha akademive të botës!!!
E dini ju se sa dokumente nga më të vlefshmet e helenistikës, egjiptologjisë, romanistikës, materiale të dala nga shkruesit e bibliotekës së Aleksandrisë etj. tashmë janë pronë e muzeve të shumë universiteteve në Britani, ShBA, Francë etj.? dhe jo pronë e shteteve apo akademive të vendeve të origjinës?
Ngadalë pak, se as akademiku më i dobët apo i paaftë nuk ka nivelin e “akademikëve” të Fb! Mos u nxitoni të shpallni epërsira dhe triumfe me punë e nivele që vetëm mund të prodhojnë nënqeshje ironike tek njerëzit me formim të mirëfilltë shkencor!
Pse, ç’mendoni ju, se po e vendosët ju vetë për ndonjë çështje të antikitetit a prehistorisë, akademitë e gjithë botës – sistemi zinxhir i tyre – do kurdisin sahatët sipas këtyre “xhevahireve” më pak sesa naive?
(SHËNIM: Megjithëse kam gradë dhe titull akademik, unë nuk jam anëtar apo kandidat i Akademisë, madje gjer tani as nuk kam bërë të hyj ndonjëherë brenda saj.)
ObserverKult
Lexo edhe:
AKADEMIA E SHKENCAVE SHKARKON DREJTORËT E INSTITUTEVE NË GJYSMËN E MANDATIT, EMËRON TË RINJ
