Poezia “Bluetooth” nga Artan Gjyzel Hasani
mbase do t’i shkruash ti poemat e mia
kur unë të mos jem më…
diçka do të ndodhë kur t’i vësh pranë
shpirtin tim dhe mendjen tënde
e pamundur të mos ndodhë
se fundja njerëzore janë
edhe mund të gabojnë
dhe të bien në dashuri bashkë
si në legjendat
i vdekur me të gjallë…
dhe nëse s’ndodh
s’ka gjë
nuk prishemi për kaq pak
une do t’i marr me vete atje
dhe ti këtu
s’do të kesh më frikë nga vdekja…
ObserverKult
Lexo edhe:
PYETËSORI I PRUSTIT: ARTAN GJYZEL HASANI
Cila është ideja e juaj për lumturinë e përkryer?
Unë nuk besoj te lumturia, aq më pak te përkryerja e saj. Në një arsyetim ideal, lumturia e përkryer do të ishte ajo gjëndje ku njerëzit i japin mundësi njëri tjetrit të jenë vetvetja pa asnjë kusht.
Cila është frika juaj më e madhe?
Lartësitë, por jo fluturimet.
Cilin person të gjallë e admironi më së shumti?
Njeriun që dua.
Cili është personaliteti historik më të cilin do të dëshironit të identifikoheshit?
Asnjëri.
Cili është tipari i juaj që nuk e pëlqeni?
Gjykimi i vetes.
Cili është tipari të cilin nuk e pëlqeni tek të tjerët?
Mosmirënjohja.
Në cilat gjëra e teproni?
Mirëbesimi.
Çfarë do t’iu shtynte të gënjenit?
Dashuria.
Cili është rrugëtimi juaj i preferuar?
Rruga e panjohur, pak rëndësi ka mjeti, mjafton që ajo rrugë të kalojë nga shpirti.
Cilën fjalë apo frazë e përdorni më së shpeshti?
Dreqi ta hajë…
Për çfarë ju ka ardhur më së shumti keq apo jeni penduar që e keni bërë?
Kur kam zhgënjyer njerëz që më kanë dashur shumë, sidomos tim atë…
Çka ose kush është dashuria juaj më e madhe e jetës?
Jeta, përderisa akoma nuk e kam braktisur.
Cila është gjendja momentale mendore e juaja?
Poetike dhe anormalisht e shëndetshme.
Nëse do të kishit mundësinë të ndryshonit vetëm një gjë tekvetvetja, cila do të ishte ajo?
Vendndodhjen e trurit. Do të ishte më mirë të ndodhej pranë zemrës.
Tekstin e plotë mund ta gjeni KËTU
