Poezi nga Arti Lushi
Në djall vaftë kjo heshtje që palcën po ma gërryen
në djall edhe ti Venerë që me hiret e tua më çmend
në djall pulëbardha e Anakreontit
në djall edhe Nositi yt Lasgush
në djall faturinot e urbaneve
në djall edhe qenushi yt e dashur
në djall filozofët e Portikës
në djall edhe Ganimedet e politikës
në djall kuçka e flijuar e Agamemnonit
në djall edhe rrufetë e tua Zeus
në djall gjithë kameleonët e gazetarisë
bashkë me ta edhe papagajtë e dashurisë
në djall gjithë vemjet e kësaj bote
E di çfarë? në djall edhe ti Sizif
në djall edhe ju me këtë globalizmin
në djall edhe virgjëreshat vegjetariane
pse jo! në djall gjithë klerikët e çdo feje
ndërsa ti o Zoti im jo! Jo tani!
në djall demokracitë industriale
në djall edhe mbingrohja e planetit
në djall vrima e Ozonit
në djall edhe tabuja e virgjërisë
në djall çdo Junë që zemra lëndon
në djall edhe ndonjë si unë që ato i dashuron..
në djall homoseksualët bashkë me feministët
në djall edhe moralistët e kritikët
në djall amvisat moderne që as konservat s’hapin
në djall edhe Ora e ndarjes nga Itaka
në djall Coca-Cola me Deklaratën e Pavaresisë
në djall edhe nafta në Lindjen e Mesme
në djall ata që të vërtetën nuk e thonë
në djall edhe ata që me “thonjëza” shprehen e në thonjëza rrojnë
në djall gjithë virtytet e Argjirosë
në djall edhe kanuni i Dukagjinit
në djall Borëbardha me shtatë tutorë
në djall edhe psikiatriku i metalurgjikut
në djall Karta e të Drejtave e Lirive të Njeriut
në djall edhe krushqitë e lidhura qysh në djep
në djall gjithë inteligjencat ushtarake
në djall edhe gjithë normat, pra, veset e shoqërisë
në djall edhe ti o Djall që si muzë e panjohur
në shpirtin tim spleen-in tënd mbjell
dhe mllef e vrer si sukses prej aty korr.
*Titulli i origjinalit “Në t’sëmës”
ObserverKult
ARTI LUSHI: METAMORFOZA E AKILIT
ObserverKult
