E dalloj në bazë të palltos me epoleta
Nuk e ndërron dimër as verë
Këmishën që ia fala një ditë më parë
Motrës ia ka veshur për fustan
Kasëmi i vogël heroi im i madh
Me një rreze të këputur dielli në qepallë
Futë duart dhe prekë fundin e kontejnerit
Për të nxjerrë kanoçe shishe plastike
Qese najloni e copa hekuri plot ndryshk
Sall liria të mos na bëhet më e pistë
Kasëmi mbrëmë ka parë një ëndërr të keqe
Ka parë zogj të varur nëpër degë
Lumenj të tharë me brigje të rrënuara
Ka parë urithët si kanë nxjerrë kokat mbi asfalt
Rrugët të lidhura për një semafor të fikur
Dhe një plak si ka rrahur tokën me bastun
E si t’i them Kasëmit që nesër do të jetë më mirë
Se do të thahet kënetishta e do të dalim në lendinë
Ashtu lakuriq të shfaqemi para njëri-tjetrit
Librin e mëkateve ta shkruajmë me pështymë
Ta mbjellim të vërtetën në gurin që heshtja thyen
