Kryetrim mbylli sytë të lutem shumë
Mos i shiko këta flamuj të gjelbër të kuq
Këto fytyra të mërdhezura këto uniforma blu
Mos shiko andej nga teatri të lutem
Se vetëm drama absurdi luhen këtu
Nuk e sheh si tokën e kanë copëtuar
Zemrën për zall po ia bluajnë çdo ditë
Nuk e sheh si janë vërsulur hienat mbi ne
Të lëpijnë plagët që ende na kullojnë
Hajna plaçkitës vrasës me pagesë
Bëjnë foto para shtatit tënd dhe i hedhin në Facebook
Të shpërndajnë atdhedashuri të rrejshme
Se të vërtetën ka kohë e kanë rrjepur deri në asht
Kryetrim mbylli veshët të lutem shumë
Mos i dëgjo këto britma këto çirrje tmerruese
Ktheu atje në shkëmbin tënd të parë
Ku një ulli ende jep fruta për shpirtin tënd
