Buqetë poetike nga Salajdin Salihu: Vdes pas gjërave të imëta…

salajdin salihu

Ju ftojmë të lexoni një cikël të zgjedhur poetik të Salajdin Salihut.

NJË DITË DO TË KTHEHEM BRIGJEVE TË JONIT

një ditë do të kthehem brigjeve të jonit
ku më pret ajo
e re
e bukur
e etur për një prekje
për një puthje
trandofile që çel në çdo stinë

thonë tehut të vetmisë ec si somnabul
ditëve ua ha thonjtë e zhgënjimit
kurvëron me vetminë
terri dhe heshtja ia kafshon gjinjtë
flakë i digjet përbrenda
e re
shumë e re është

një ditë do të kthehem brigjeve të jonit
detin e shpirtit s’e ngrin gjëma

I NDEZ CIGARET REND SI ZHAK PREVERI

i ndez cigaret rend si zhak preveri
ti s’je në dhomën e zbrazur
brenda më ngulfat vetmia
dritaret kaherë i kam mbyllur
dhe dyert
ku mund të hyjë marrëzia

notoj nëpër tymin e vjellë në ajër
në saksi vyshken lulet…

ca gjethe të vdekura
në një peizazh vjeshte
era e kujtimeve i mbart
si në poezitë e zhak preverit
ca gjethe të lehta
si puthje në stacion
ku të përcjell trishtimi
dhe të pret
siç i pret i burgosuri festat
puthje të lehta
si vdekja

ndez cigaret rend si zhak preveri
dhe nuk e rrëfej jetën time
dhe nuk e rrëfej jetën time…

AI QË DASHURON

Ai që dashuron
mbahet për fije kashte
ec nëpër telin e hollë
sipër një honi

Ai që dashuron
është i verbuar
nga ëndrrat
dhe nga pasioni…

I guximshëm është
ai që dashuron
si fëmijë e prek zjarrin
dhe qan vetëm pasi digjet…

KAM SHUMËÇKA TË TË THEM

kam shumëçka të të them bona
po thellë në qenien time banon e pathëna
mund ta lexosh vetëm në sytë e mi

mos i beso fjalës
qëndrimit tim përpara kamerës
si rri i pispillosur me pudër në fytyrë
as kravatës sime të hekurosur si fjali diplomati
demostenët s’kanë vdekur
i tillë jam
kur kokat ua lajm njerëzve
në pikë mesnate
me akullin e fjalëve

besoi të pathënës
mos u bëj e zakonshme
asnjë çast s’dua të ndiej neveri
për ty

KE SHUMËÇKA TË MË THUASH

t’i lexoj mendimet
në sytë e tu ullinj
plot fshehtësi e dhembje
ta lexoj dyshimin
që ta derdhën si helm në vesh
ata që quan të më vrasin qenien tënde
në ëndrrat tua blu
si një xhon lenon

ke shumëçka për të më thënë
e di
po s’jam i shenjtë
jam vetëm njeri
desha ta shijoja gjithë atë që është njerëzore
ta kuptoja pse vdesin të zhgënjyer
ata që e duan jetën…

asgjë mos më thuaj
joko onoja ime
gramatikën tënde të heshtjes e kuptoj
i deshifroj hieroglifet e të pathënës
që s’arrin në veshin
me qendër të prishur drejtpëshimi

asgjë mos më thuaj
kësaj dite i duhet qetësi idil

KEMI SHUMËÇKA T’I THEMI NJËRI-TJETRIT

shumëçka kemi për t’i thënë njëri – tjetrit
po heshtja nuk di pse i pëlqen dashurisë
edhe kjo poezi është e heshtur
vetëm ne mund ta lexojmë të pathënën
ne dy qirinj që digjemi në heshtje
dy poezi që lexohemi me prekje
siç lexohet një libër nga i verbëri borges
atje në atë pallat të harruar
bëjmë dashuri pa petk droje veshur
përshpëritim të pathënën me gjuhë lulesh
…dhe dashurohemi

të tjerë jemi atëherë
flasim me heshtje
me puthje
me prekje…

VDES PAS GJËRAVE TË IMËTA

vdes pas gjërave të imëta si ti
e thjeshta ime
madhështore
vdekje e përkohshme
dashuria
nismë e një rilindjeje të moçme

vdes për një natë
me një krevat
ku rri shtrirë cullak
dhe pret
të më mbulodh
me trupin tënd fluid
mall
varr
dritë
det
përjetësi
fron përmbi frone
njeri që sfidon shenjtërinë
dashuri
det i kaltër zhgënjimi
harrim i paharruar
që zgjat përjetë
këngë dhiatë
që s’do të kem kohë ta shkruaj

vdes pas gjërave të imëta si ti…

EDHE DASHURITË ARRATISEN

Edhe dashuritë arratisen lodhen si njerëzit
Kanë nevojë të shëtisin
Kanë nevojë për ajër të pastër
Në tjera kështjella ndjenjash të strehohen
Dashuritë janë si njerëzit, e dashur
Tradhëtojnë vetveten
Dhe kthehen aty ku kanë lindur
Si gjithësia
Te një çast i vetëm

————————————–

Biografi

Selajdin Salihu lindi më 1970 në Tetovë. Ka kryer Fakultetin e Filologjisë në Universitetin e Tetovës, ka magjistruar për dramaturgji në Universitetin e Prishtinës dhe ka doktoruar për shkencat filologjike në Universitetin “Shën Cirili e Metodi” të Shkupit.

Disa vite ka punuar si gazetar e redaktor në media kombëtare e ndërkombëtare. Është autor i disa librave. Shkruan poezi, ese, drama, por edhe studime mbi letërsinë. Poezitë dhe shkrimet e tij janë botuar në disa gjuhë të botës (anglisht, frëngjisht, gjermanisht, rumanisht, gjuhën ukrainase, maqedonisht, turqisht, greqisht, sllovenisht, italisht, kroatisht, bullgarisht, në gjuhën malazeze etj.).

Poezitë e tij janë përfshirë në shumë antologji e panorama poetike kombëtare he ndërkombëtare.
Është fitues i disa çmimeve kombëtare dhe ndërkombëtare, sikurse: Çmimi “Serembe”, për libër më të mirë me poezi, Çmimi “PEN Albania” etj.

Ka qenë ligjërues në Universitetin e Europës Juglindore, kurse tani është ligjërues në Universitetin e Tetovës.

ObserverKult

Lexo edhe: CIKËL ME POEZI NGA ERINA ÇOKU: ATJE KU ISHUJT E SHPËTIMIT JANË