Mos ikni territ si ata
që i mbushën zemrat e shkyeme
kujtime lirie e luftnash
tue kapërcye pragun e kufinit
mbramjeve vonë
furrikun e stërkopilave
tue pështy me mallin e atdheut
Me ikë sot me dalë të ata që ikën dje
tue i gjuejtë me gurët e lotëve
llaveshat syshkyem me fytyra t’larme
bahet gjamë e vonë m’u kthye
me i kositë andrrat
n’Dardaninë e shlirueme
nga këta që e përbinë e s’u nginë
Mos ikni ikjeve t’atyne që s’e pritën hanën
bahet vonë m’u kthye me pa t’bukurën
që kanë thanë vjen nesër
Mos e ikni shpirtin nga t’pashpirtët
se bahet mirë!
