E kur m’kap malli
Njashtu si sot, dje, e edhe nji ditë para m’vjen nëpër mend nji hije e tretun e jotja
N’atë dakik m’kujtohet edhe njiherë, mbase për t’mijtën herë, se t’due
Jo veç pse s’kam kë tjetër me dashtë
Po se s’due me dashtë dikë tjetër pos teje
T’du se s’muj me pa dritë n’dashnin’ tane
E kur s’shoh dritë shkruej poezi
E poezinë e du ma fort se ty
E ty t’du deri te vargu jem i parë i nji mesnate koti
T’du njashtu si don edhe Zoti
Prej larg
Pa ta ni erën, pa na u prekë trupat
E du me t’dashtë gjithë jetën kshtu
Tu t’imagjinue ty e mu n’dashnitë e tjerve
N’frekuenca t’shkurta kujtimesh
Ku zani yt m’vjen veç si nji vegim i largt’, i harruem
Du me t’dashtë k’shtu se unë s’di me jetue pa t’dashtë
Kur i msheli sytë e para m’dalin sytë e tu me qerpikt e kthyem si hana e ndame n’gjystë
Du me t’dashtë bash n’qito copat e shkurtueme t’kohës
Për me t’gjetë n’secilën pjesë t’thyeme temen
Edhe Zoti don qishtu
Pa u prekë, pa u pa
Si nji asgja e hidhun po e shenjtë
Edhe Zoti don qishtu
N’hapsinat e dakikave t’kujtimit qi m’bjen ndërmend se ti je dikun
E n’dikunin tand unë s’kam ndalue t’dashtuni.
ObserverKult
Lexo edhe:
Martha Rivera Garrido: Mos u dashuro pas një gruaje që lexon
