Poezi nga Elona Çuliq
Nuk duhet me pasë frikë mos me u ndje mirë
Me u ndje e mërzitun dhe e humbun
Me u ndje sikur je vonë për gjithçka dhe ke humbë ritmin e vetes
Nuk duhet me pasë turp që nuk fokusohesh vetëm tek të mirat
Jeta nuk përmasohet vetëm prej tyne
Ti je gjithçka që të kalon nëpër mendjen dhe zemrën tande
Nëse ndjen frikë – ji aty
Nëse ndjen dyshim – ji aty
Nëse ndjen humbje – ji aty
Nëse ndjen dhimbje– ji aty
Ti je gjithçka ndjen
Ji ajo që ndjen
Thuaje atë që ndjen
Mos u përpiq me e fshehë
As me grim e as me buzëqeshje me vello lotësh
Mos e gënje asnjëherë veten
Në sytë e kërkujt
Mos i thuaj vetes “nesër ka me kenë ma mirë”
Jo, e nesërmja asht sot
Mos i thuaj vetes “kalon”
Jo, asgja nuk kalon,
Gjithçka duhet me e përjetu
Me e gërmu
Me e blue
Me e lanë me të blue
E gërmue
Deri aty ku dhemb
Djeg
Përvëlon
E zgjon
Nuk duhet me pasë frikë e marrë me qa
Me qa me ngashërim e përhumbje
Para vedit e tjetrit
Nëse loti bjen në faqe – ji aty
Nëse loti t’i mbështillet zemrës – ji aty
Nëse loti ta mjegullon mendimin – ji aty
Nëse loti ta turbullon shikimin – ji aty
Banu lot
Qaj
Qaj
Derisa shikimi
Zemra dhe mendimi të pastrohen
E të mundesh me pa qartë
me sy, zemër e mendje.
ObserverKult
Lexo më shumë nga kjo autore:
***
Elona Çuliq lindi në vitin 1986 në Shkodër. Ndonëse një zë i ri në letërsinë shqipe, poezia saj njihet për një formë misticizmi që rrjedh natyrshëm, nëpërmjet një gegnishteje të pasun figurash letrare.
Është autore e dy librave me poezi “Pa titullni” botuar në Vjenë në vitin 2015 dhe “rranjës e kangës” botuar nga shtëpia botuese Fiornetia, ne vitin 2018, me mbështetjen e Fondit për Shkrimtarët e Rinj, nga Ministria e Kulturës e Shqipërisë.
Fituese e disa çmimeve letrare brenda dhe jashtë vendit, poezia e saj është përkthyer në gjuhën italine, angleze dhe gjermane.
Ka qenë dy herë prezantuese e letërsisë shqipe, me mbështetjen e Ministrisë së Kulturës së Shqipërisë, në Panairin e Librit ne Leipzig dhe në Sallonin Ndërkombëtar të Librit në Torino.
Ajo ka qenë e ftuar si shkrimtare në rezidencën letrare “Artisti në Rezidencë”, mbështetur nga KulturKontakt Austria, në vitin 2017, dhe në rezidencën “Prishtina pa lumë”, mbështetur nga Qendra Multimedia, në vitin 2018.
Guximtare në zbulimin e vetes dhe shpërfaqjeve artistike ajo ka eksperimentuar në fusha të ndryshme si përkthimi, shkrim drame, pikturë, instalacion dhe performancë.
Kjo i hapi dyert si pjesëmarrëse perforumese në Bienalen e Artistave të Rinj të Mesdheut, Festivalit të Dadaizmit, oragnizuar nga Poeteka dhe në Teatrin Volkstheater në Vjenë. Larg nga zhurma dhe me maturi, Elona shkruan për të përditshmen gati me naivitetin e një fëmije, i cili duke qenë më afër Zotit, thotë të vërteta që na shokojnë.
ELONA ÇULIQ: ASNJË MALL NUK QENKA MA I BUKUR SE MALLI PËR TE
