Entela Tabaku: Fëmijët e emigrantëve

31/07/2022 • 11:04

fëmijët e emigrantëve janë fëmijët për të cilët
gjyshja asht ajo fytyra e qeshun në skype
ajo grueja e ngrohtë që i shtrëngon fort
e nuk din me i lëshu
dy javë
në verë

fëmijët e emigrantëve nuk e dinë
se gjyshja asht një prehën i ngrohtë
ku ti mundesh me u fshehë çdo ditë
asht ajo që t’i fal tana pa kushte asht
një bohçe me xhepa mbushë me gjana për ty
asht zani që të pajton
me kangë të vjetra që ti s’i kupton
por që të kujtohen papritmas një ditë
kur bjen shi e ai që don ka ikë asht
plaka që ta ban nanën të re
e të tregon se jeta asht e bukur
se kështu ka qenë
se kështu ka me qenë
e se ia vlen

tanë shiu i botës ia vlen
fëmijët e emigrantëve
të mirët e mi!