Dashunia jonë nuk ka të ngjashme,
se na të dy jena lulemolla të lidhuna afër
e sa herë fryn era na shpërndan nëpër dete
e aty kthehena në anije të vogla, me ne sipri
nisena nëpër brigjet e botës.
Se dashunia jone nuk ka të ngjashme
prekjet ma të fuqishme të saj
janë nji hanë e argjend që rrëshqet
mbi gjijtë e ujnave e krijon anije të tjera
prej andrrash, me ne mrenda në përkundje.
Sa herë e thërras emnin tand ai bahet nji re
e pafund prej lulemollash e mbulon horizontin
se na të dy i kena rranjët në qiell e aty mbjedhim
vedin sa në nji rrymë në tjetrën e bahena fruta.
Ndoshta vjen nji kohë e nji ditë qe ka me jetue me ne.
ObserverKult
Lexo edhe:
GJERGJ JOZEF KOLA: ME KENË SHKRIMTARË DUHET ME PASË MBI TË GJITHA: NJI SHPIRT FISNIK
Kliko edhe:
Krijimi letrar si natyrë në vedi.
Krijuesi artistik, ka në vedi, den schöpferischen Geist, i thonë gjermanisht, e tanë fryma e tij përdoret vetëm për nji qëllim: Me dhanë karakteret në art.
Kjo asht edhe motoja e çdo shkrimtari, e çdo krijuesi letrar. Me kapë karakterin e plotë të personazhit dhe me e dhane atë në atë mënyrë që çdokush me ndeshë njeriun e gjallë të jetës.
Sa ma i gjallë, ma i plotë, ma i fuqishëm ky karakter, aq ma e madhe asht vepra e Autorit.
Në Shqipni gjatë diktaturës, të gjithë e dijmë se kena pasë aktorë të mrekullueshëm, porse autorë shumë të dobët teatri e filmi dhe aktorët kanë pasë fat, sidomos ato të Teatrit, sepse kanë vu në skenë edhe rolet nga gjenitë e botës e kanë shpalosë kështu edhe aktin e tyne krijues, prandaj na ende sot kujtojmë shumë aktorë, porse thuajse asnji autor të diktaturës.
Tekstin e plotë e gjeni KETU
ObserverKult
