Promovimi i librit më të ri poetik të autores dhe poetes së njohur, Donika Dabishevci “Grue prej Zjermi”, të botuar nga Shtëpia Botuese “Littera” ishte pjesë e veçantë e pasdites së dytë të Kolonisë Letrare “Muzat e Jezercit”.
Në një ambient të mbushur me artdashës, shkrimtarë, kritikë e miq të fjalës së shkruar, mbrëmja solli një atmosferë ku vargu i fuqishëm dhe ndjeshmëria e thellë femërore ishin kryefjala e bisedës.Për vlerat letrare dhe veçantitë krijuese të këtij vëllimi folën Arsim Hamiti dhe Mërgim Bekteshi, ndërsa Klejda Plangarica lexoi një shkrim kritik të Sarë Gjergjit kushtuar librit.
Mbrëmja u pasurua me leximin e poezive nga vëllimi, të interpretuara nga poetja Naime Beqiraj, ndërsa ajo që e bëri edhe më të veçantë këtë takim ishte se të pranishmit patën mundësinë të dëgjojnë disa nga poezitë e zgjedhura nga vetë autorja, leximi i të cilave përcolli emocion të drejtpërdrejtë te publiku.
Aktiviteti u zhvillua nën moderimin e Nazmi Berishës.
Për zërimin u përkujdes Kujtim Shabani, ndërsa momentet e kësaj mbrëmjeje letrare u dokumentuan përmes fotografive dhe videove nga Fatmir Vata.
“Muzat e Jezercit” vazhdojnë të krijojnë hapësira takimi mes autorëve, veprave dhe lexuesve, duke sjellë në vëmendje krijimtarinë bashkëkohore shqipe.
ObserverKult
