![](https://observerkult.com/wp-content/uploads/2023/01/kishaaaa.jpg)
Nga dhomat e shtëpisë, zbret në një kishë katakomb deri më tani, unike në Shqipëri. Është vetëm disa metra katrorë dhe mbart vlera historike, fetare dhe kulturore.
Kisha e vjetër gjendet brenda lagjes “Kala” në Elbasan, nën themelet e banesës ku është rritur edhe prifti 20-vjeçar, Nikolla Xhufka, i cili, vendosi ta zbulojë për të gjithë.
![](https://konica.al/wp-content/uploads/2020/12/Screenshot-2020-12-07-122735.jpg)
“Ndihemi familjarisht të bekuar nga Zoti që kemi mundësi që t’i drejtojmë lutjet tona Zotit në këtë kishë”, tha kohë më parë, prifti Nikolla Xhufka.
Kisha me emrin e Shën Kozmait, sipas tij, ka funksionuar në shekuj për besimtarët edhe në kohë luftrash, pushtimesh e diktaturash.
![](https://konica.al/wp-content/uploads/2020/12/Screenshot-2020-12-07-122706.jpg)
“Vlerat historike që kjo Kishë ka, e para është lipsani i Shën Jovan Vladimirit, që është një vlerë shpirtërore e jashtëzakonshme. Një vlerë tjetër e shtuar, është që kjo kishë është ndërtuar sipër murit të kalasë, gjë që, nuk besoj se e ka hasur ndokush”, pohoi prifti Nikolla Xhufka.
Gjithçka ka mbetur ashtu siç ka qenë ndër breza, thotë prifti që është gati ta hapë edhe për turistët, kishën e vogël nën dhe.
“Patjetër që do ishte mirë, që kjo kishë të ishte atraktive për turistët, të vinin ta shikonin”, shtoi ai, transmeton ‘konica.al’.
![](https://konica.al/wp-content/uploads/2020/12/Screenshot-2020-12-07-123403.jpg)
Historiku i kishës:
Kisha Shën Maria në Elbasan është një nga kishat më të vjetra ortodokse në Shqipëri. Ajo u ndërtua në gjysmën e dytë të shekullit të XIII, në lagjen “Kala” të këtij qyteti.
Sipas arkivave të Vatikanit, më herët, rreth viteve 458-519 flitet për ekzistencën e një katedraleje në qytet.
Por, kisha merr një rëndësi të veçantë sidomos pas pushtimit turk. Në atë kohë, banorët e lagjes “Kala” iu drejtuan me një kërkesë Portës së Lartë ku i kërkuan që të mos prishej kisha.
![](https://konica.al/wp-content/uploads/2020/12/Screenshot-2020-12-07-123442.jpg)
Si rrallëherë në historinë e perandorisë Osmane, Porta e Lartë e mori në konsideratë kërkesën e banorëve të lagjes “Kala”, por vendosi një kusht, kisha nuk do të shembej, por kulla e këmbanës së saj nuk do të ishte më e lartë se sa minaret e xhamive në qytet. Dhe ashtu u bë. Kisha nuk u shemb.
Përreth kishës ndodhej varreza dhe në nder të besimtarëve ortodoksë, u vendos që ata të zhvarroseshin të gjithë dhe eshtrat të vendoseshin në dyshemenë e kishës. Dhe ashtu u bë. 600 skelete njerëzish u sistemuan në dyshemenë e kishës dhe sipas të dhënave ndodhen aty edhe sot e kësaj dite. Gjithashtu nën dyshemenë e kishës Shën Maria, ndodhen katakombe dhe tunele të nëndheshme, që përfundojnë në male dhe në Shkumbin.
Kisha u dogj në vitin 1818, por u rindërtua në vitin 1826. Ndërtimi i ikonostasit të saj, përfundoi në vitin 1833.
———————-
Lexo edhe:
Kisha e Shën Mërisë në ishullin e Maligradit, guri i çmuar i Prespës
ObserverKult