Në edicionin e këtij viti të Çmimit Letrar të Bashkimit Evropian, Kosova do të garojë me shkrimtarin Arben Idrizi.
Ai është nominuar me librin “Njeriu që habitej dhe tregime të tjera”.
Kjo është një vepër në prozë që eksploron dhunën, traumën dhe çudinë si kushte ekzistenciale të jetës njerëzore përballë historisë. Në qendër të saj qëndron figura e Isak Kodrës, një i mbijetuar i një masakre lufte, i cili, pasi ka dëshmuar të padurueshmen, mbetet i ngrirë në një gjendje habie të përhershme. Përmes këtij rrëfimi dhe një sërë tregimesh të lidhura tematikisht, libri ndërton një univers të errët në të cilin dhuna nuk është thjesht një ngjarje, por një mënyrë të menduari, të kujtuari dhe të ekzistuari.
Rrëfimet e Arben Idrizit paraqesin luftën, pushtimin, dëbimin, vrasjet arbitrare dhe absurditetin e historisë, duke lëvizur nga realiteti historik konkret drejt përmasave alegorike dhe metafizike.
Idrizi është poet, shkrimtar dhe përkthyes. Ai është autor i njëmbëdhjetë librave, përfshirë dhjetë përmbledhje poetike dhe një vëllim me tregime të shkurtra. Vepra e tij është botuar nga disa shtëpi botuese të njohura rajonale dhe pasqyron një angazhim të vazhdueshëm me rrymat bashkëkohore të letërsisë evropiane.
Përveç krijimtarisë së tij origjinale, Idrizi ka përkthyer në shqip vepra të rëndësishme të autorëve të njohur evropianë, përfshirë Valerio Magrelli, Tino Caspanello, Roberto Calasso, Giacomo Leopardi dhe Cesare Pavese./reporteri
ObserverKult
Lexo edhe:
