Leonard Cohen: Kjo është për ty

leonard cohen stili

Kjo është për ty është
zemra ime e plotë
është libri që doja të ta lexoja
kur do të plakeshim
Tash jam një hije
Jam i shqetësuar si një perandori
Ti je gruaja
që më ka liruar
të pashë derisa shikoje hënën
ti nuk ke hezituar
të më duash me të
të pashë duke nderuar lulet e egra
kapur në shkëmbinj
më ke dashur me to
Në rërën e lëmuar
midis guralecave dhe vijës bregdetare
më mirëprite në rrethin tënd
më shumë se një mysafir
E gjithë kjo ndodhi
në të vërtetën e kohës
në të vërtetën e trupit
të pashë me një fëmijë
ti më sole tek ky parfum
dhe vizionet e tij
pa kërkuar gjak
Në shumë tavolina prej druri
të stolisura me ushqime dhe qirinj
një mijë sakramente
që ke mbajtur në shportën tënde
kam vizituar argjilën time
kam vizituar lindjen time
derisa u bëra mjaft i vogël
dhe mjaft i frikësuar
për të lindur sërish
të kam dashur për bukurinë tënde
ti më ke dhënë më shumë se veten tënde
ti ke ndarë bukurinë tënde
Këtë e mësova bash sonte
derisa kujtoj pasqyrat
nga të cilat u largove
pasi u kishe dhënë
çdo gjë që ato pretendonin
për njohjen time
Tash jam një hije
kam mall për kufijtë
e bredhjes sime
dhe unë lëviz
me energjinë e lutjes tënde
dhe unë lëviz
në drejtim të lutjes tënde
sepse ti rri e gjunjëzuar
si një buqetë
në një shpellë eshtrash
pas ballit tim
dhe unë shkoj drejt një dashurie
që ti e ke ëndërruar për mua

Përktheu: Fadil Bajraj

ObserverKult


Lexo edhe:

“KRYQËZOVA”, POEZI NGA CARL KAUCHER