Të enjten dhe të premten në Prishtinë do të mbahet edicioni i katërt i Festivalit të Prozës Artistike “Fiction Fest”, organizuar nga Qendra për Kulturë dhe Edukim “Sheshi”.
Në mbrëmjen e parë (25/11, e enjte) do të lexojnë këta shkrimtarë: Shefkije Islamaj, Majlinda Bregasi, Gani Mehmetaj, Ballsor Hoxha dhe Azem Deliu.
Ndërsa, në mbrëmjen e dytë (26/11, e premte) do të lexojnë këta shkrimtarë: Ibrahim Kadriu, Ana Kove, Binak Kelmendi, Andreas Dushi dhe Enkelejd Lamaj.
Të dy mbrëmjet fillojnë në ora 19:00 dhe mbahen në restorant “Amaro”, që ndodhet në rr. Eqrem Çabej, përballë Fakultetit të Filologjisë-UP, Prishtinë.
Në vazhdim ju prezantojmë me autorët që do të lexojnë nesër.
Shefkije Islamaj ( 1953 – ) u lind në Likoc të Skënderajt. Shkollimin fillor e kreu në Skënderaj më 1968 ndërsa Normalen në Mitrovicë më 1972. Studimet për gjuhë dhe letërsi i mbaroi në Fakultetin Filozofik të Prishtinës më 1977. Studimet pasdiplomike i përfundoi më 1980.
Pas një periudhe dy vjeçare (1982) e mbrojti temën e magjistraturës me titullin “Sinonimet në gjuhën shqipe”. Në vitin 1999 e mbrojti tezën e disertacionit me titullin “Veçoritë leksiko-semantike dhe stilistike të gjuhës së veprës letrare të JakovXoxës”.
Në vitin 1977 u punësua asistente në Institutin Albanologjik të Prishtinës, në Degën e Gjuhës. Është anëtare e Lidhjes së Shkrimtarëve të Kosovës dhe anëtare e grupit redaksional të Fjalorit Enciklopedik të QSA-së në Tiranë. Që prej themelimit të tij më 2004, Shefkije Islamaj, është anëtare e Këshillit Ndërakademik për Gjuhën dhe kryetare e Grupit të Kosovës për Çështje të Leksikut.
Është autore e romanit “Mos më thuaj se më ke parë ëndërr (2004), dhe monografive shkencore, si “Çështje të sinonimeve në gjuhën shqipe”(1985), “Fjalor i fjalëve të huaja” (bashkautor,1987), “Gjuha e Jakov Xoxës”(2000), “Kultura gjuhësore dhe përdorimi estetik i gjuhës”, (2002), “Gjuha, ligjërimi dhe fjala”, (2004), “Gjuha dhe identiteti” (2008), “Gjergj Fishta – Gjuha dhe stili, I, II” (2012), Gjuha, teksti dhe konteksti (2014) dhe “Gjuha, gjuhëtarët dhe shkrimtarët (2017)”.
Është fituese e çmimit “Shkencëtar i vitit” nga MASHT (2012). Jeton në Prishtinë.
Majlinda Bregasi është shkrimtare, gjuhëtare dhe dokumentariste.
Është shkolluar në Universitetin e Prishtinës dhe atë të Firencës, ku ka vijuar studimet e doktoraturës dhe post-doktoraturës në Gjuhë dhe Letërsi Evropiane dhe Studime Amerikane. Është profesoreshë e gjuhës italiane dhe latine në Universitetin e Prishtinës.
Në vitin 2015 boton romanin e saj të parë “Ikje” (Botimet Koha), që nderohet me çmimin “Anton Pashku” nga Ministria e Kulturës, Rinisë dhe Sportit (MKRS). Ky roman është përkthyer në gjuhën bullgare me mbështetjen e Tradukit.
Romani i dytë “Fillimi i një fundi”, 2017 (Botimet Koha), u përkthye në gjuhën italiane dhe u botua në Itali nga LFA Publishing House me titullin “Manoscritto”
Romani “Gërsheti i prerë”, 2019 (Botimet Koha), ishte kandidat për Çmimin Evropian për Letërsi, 2020.
Bregasi është autore e një numri të gjerë studimesh shkencore mbi komunikimin, analizën e diskursit politik, si dhe autore e monografisë “Përtej debatit politik”, 2015, që është studimi i parë në gjuhën shqipe i teorisë së analizës së bisedës.
Gjithashtu, është autore e disa filmave dokumentarë, si “Pompei- një udhëtim në kohë”, “Francesco Cangiullo”, “Kodi i jetës”, “Gjama e maleve”, “Rrno për me tregue”, “Pesha e fjalës”, “Bohemi i fundit” etj.
Gani Mehmetaj (1955) u lind në Dubovë, Pejë. Shkollën fillore e Gjimnazin i kreu në Pejë, Fakultetin e Shkencave Politike, degën e Gazetarisë e kreu në Universitetin e Prishtinës, studimet pasuniversitare në Universitetin Ndërkombëtar të Strugës. Shkroi kritika filmi, ese e studime, drama e romane.
Gani Mehmetaj për një kohë ka qenë drejtor i Kosovafilmit dhe gazetar, redaktor e kryeredaktor në gazeta e revista shqipe në Kosovë. Është fitues i Shpërblimit letrar “Kadare” që jepet nga Universiteti Evropian i Tiranës.
Veprat e tij letrare janë: “Kujtime të trishta”, tregime, 2010, “Qyteti në ankth”, roman, 2011, “Aventurat e Lulisë”, roman, 2012, “Nata e fantazmave”, triptik me një monodramë, 2014, “Ilirianët”, tregime, 2015, “Zhvarrimi”, roman, 2016, “Boritë e Apokalipsit”, roman, 2017, “Kalorësit e Dardanisë”, roman, “Nata e trazuar”, roman, 2020 dhe “Zogjtë e qyqes”, roman, 2021.
Po ashtu, Gani Mehmetaj shkroi dhe botoi edhe një sërë veprash të fushës së kritikës së filmit dhe publicistikës.
Ballsor Hoxha është autor i dy përmbledhjeve me tregime dhe dy përmbledhjeve me poezi. Njëra prej përmbledhjeve të tij me tregime është përkthyer dhe botuar në Maqedoninë e Veriut.
Gjithashtu, së voni, ka botuar edhe një studim mbi disa vepra të Ismail Kadaresë.
Është një ndër studiuesit më të njohur shqiptar të letërsisë dhe fenomeneve bashkëkohore.
Është autor i njohur në vendet shqiptare me karrierën e tij të shumanshme.
Ka punuar në shkrimin e skenarëve me disa nga regjisorët më të njohur shqiptarë.
Ndër të tjera është edhe kritik dhe studiues i filmit kosovar dhe ndërkombëtar.
Me edukim është profesor i gjuhës, letërsisë dhe kulturës angleze dhe amerikane.
Azem Deliu u lind me 10 janar 1996 në Skënderaj.
Ai është autor i 3 librave, dy prej të cilëve në prozë, si “Puthësi i paligjshëm” dhe “Shënimet e krimbit Smolinski”.
Libri i tij i fundit, “Shënimet e krimbit Smolinski” ishte finalist për Çmimin Evropian për Letërsi, ndërkohë që u përkthye në disa gjuhë. Deliu ka qenë në 4 rezidenca ndërkombëtare për shkrimtarë.
ObserverKult
