1.
Një pishë mbiu në mue
shpejt u ba sa shtati jem
Nuk dihej ma cili ishim
Unë në pishë
A pisha në mue
Ajo ecte si njeri
Unë kryet lart
si pishë
Në një thep
Rugove
zum’ n’thue
E njëjta hije
u përplas
para nesh
Një sopatë
dëgjohej
larg
2.
A ka Rugovë
Pa rugovas
Një shallë tundet
Pllajave
Nga era Grykës
Shkon e ndalet
Maje pishës
Një majekrahu
za i humbun
Thepave
Tungjatjeta, hej
Një plis
rrokulliset
Ujvarës pikëlluese
gurëzohet në gur
Udhës së hekurt
nuk ngjitem
E thej qafën
Qafës së dasmorëve
3.
Në Patrikanë
Muroset mallkimi
Lutjet e rreme
i merr lumi
Asnjë
kambanë
Nuk fton
n’besim
Shkoj e vijë
si një Adam
I harlisun
N’ Pejë
Në Çarshinë e gatë
e blej një qystek
për orën teme
t’humbun.
ObserverKult
Lexo edhe:
