Pyetësorit të Prustit në ObserverKult i përgjigjet shkrimtarja Linda Agolli:
-Cila është ideja juaj për lumturinë e përkryer?
Lumturia e përkryer është një monument gjigant ngritur në kokën e njeriut, ngjeshur brenda një kohe mikroskopike që është çasti dhe që përpiqem ta kap.
-Cila është frika juaj më e madhe?
Errësira. Në të gjitha kuptimet: reale dhe metaforike.
-Cilin person të gjallë admironi më së shumti?
Motrën që aktualisht kujdeset për nënën.
-Cili është personaliteti historik me të cilin do të dëshironit të identifikoheshit?
E pamundur, edhe sikur të desha. Por, më rend në mendje figura e O’Conell, prijësit irlandez, njohur si “Çlirimtari”.
-Cilin tipar tuajin nuk pëlqeni?
Asnjë dhe të gjitha. Shpesh u ndërroj vendet. Por mbetem tek Unë, gjithsesi.
-Çfarë nuk pëlqeni te të tjerët?
Prirjen për t’i drejtuar gishtin tjetrit.
-Në cilat gjëra e teproni?
A u gjendet fundi gjërave?! Tentoj me tepri.
-Çfarë do t’ju shtynte të gënjenit?
E kotë! Gënjeshtra është njësoj si të përdorësh një thupër thane për t’u mbajtur, në vend të bastunit. A mbahesh dot për thupër thane?!
-Cili është rrugëtimi juaj i preferuar?
Udhëtim brenda Njeriut, udhëtim thellë Dijes. A nuk janë planete për t’u eksploruar?!
-Cilën fjalë apo frazë përdorni më shumë?
Fjalën “ndoshta”. Orienton drejt zbulimit të së vërtetës.
-Për çfarë ju ka ardhur më së shumti keq apo jeni penduar që e keni bërë?
Rëndësia që i kam dhënë të parëndësishmes; koha e humbur!
-Çka ose kush është dashuria juaj më e madhe e jetës?
Bijtë. Krijimtaria.
-Cila është gjendja momentale mendore juaja?
Meditative.
-Nëse do të mund të ndryshonit vetëm një gjë te vetja, cila do të ishte ajo?
Vetëgjykimi.
-Çfarë konsideroni arritjen tuaj më të madhe?
Arritjet e fëmijëve të mi.
-Nëse do mund të kthenit kohën, çfarë do ndryshonit?
Mbase do ta përdorja më me efikasitet atë, kohën pra.
-Nëse do vdisnit dhe do të kishit mundësinë të ktheheshit qoftë njeri apo send, kë person apo cilin send do zgjidhnit të kishit qënë?
Albatros… në kiç të anijeve.
-Cila është gjëja më e shtrenjtë që poseidoni?
Hëm…nuk është “gjëja” është Qenie – biblioteka e trashëguar nga prindërit shtuar e pasuruar në vazhdim prej meje.
-Çfarë konsideroni mjerimin më të madh?
Nuk ka mjerim më të madh se zilia!
-Ku do të dëshironit të jetonit?
Atje ku ndjehem e lirë.
-Cila është cilësia juaj më e veçantë?
E vërteta! Dhe ç’është e vërteta, fokusi im janë mangësitë e mia.
-Çfarë vlerësoni te një burrë?
Vetëpërmbajtjen. Instikti i një burri, shpesh nxiton aq sa thyen hundët.
-Çfarë vlerësoni te një grua?
Urtinë. Ndjeshmëria e një gruaje, nxiton po aq sa instikti i një burri.
-Cili është shkrimtari juaj i preferuar?
Doemos, një gjigantsi Viktor Hygo e pastaj edhe të tjerë.
-Cilët janë heronjtë tuaj në jetën e vërtetë?
Ata që ia thonë vetes të vërtetat në sy.
-Cilin talent do të dëshironit të kishit?
Atë të Sokratit. Ai më tha “njih veten”. A nuk kërkon dhe kjo talentin e vet?!
-Si do dëshironit të vdisnit?
Kush dëshiron të vdesë?! Por meqë është e pashmangshme, le të vdes pa e ditur.
-Cila është motoja juaj?
Kalo nëpër rrathë duke ndjekur vijën e drejtë! Dhe jam autore e këtij “zbulimi!” E kam shkruar edhe në librin me aforizma që po përgatis.
ObserverKult
Lexo edhe:
