Rekomandime leximi nga Arti Lushi

Në kuadër të rubrikës Rekomandime leximi, ObserverKult kësaj radhe ka mysafir poetin Arti Lushi.
Ja cilat janë tri librat që Lushi u sugjeron të pasionuarve pas leximit.
______________________________

Libri është Dashuri.

Ngado që ta marrësh. Premtimin “në të mirë e në të keq” që partnerët i bëjnë njeri-tjetrit në altar, libri e përmbush më së miri, madje e tejkalon.

Nga Arti Lushi

Libri na shërben për të njohur veten, botën, botën nëpermjet vetes dhe veten nëpërmjet botës. Dhe nëse në përgjithësi kemi artin për të mos vdekur nga e vërteta, librin e kemi për të mos vdekur fare.

Duke iu përgjigjur pozitivisht ftesës së ObserverKult, do mundohem shkurtimisht të sugjeroj tre dashuri:

1. Udhëtim në fund të natës nga Louis-Ferdinand Celine

Një libër dashuri që i rikthehem herë pas here. Gjithçka që kërkoj në një roman i gjej aty. Njeriu, fati, absurdi, sakrifica, aventura… të gjitha të trajtuara me një stil të jashtëzakonshëm dhe me një humor të zi që të mban mbërthyer deri në fund.

Anti-heroi, Bardamy, një kut vërtetësie i njeriut.

Udhëtimi, një kryevepër.

2. Pape Satan Aleppe nga Umberto Eco

E cilësuar si kënga e mjellmës së autorit, pa drojë mund të them që është një ndër librat që më ka edukuar dhe zbavitur, njëherësh, pa masë.

Një kronikë e shoqërive të lëngshme, koncept i huazuar nga Hobsbawm, libri është i ndarë në zarfe, ku trajtohen çështje dhe dukuritë nga më të ndryshme.
Art, fe, sociologji, filozofi, shkencë, teknologji, politikë e shumëçka gjenden në këtë libër të mrekullueshëm.

3. Eshtra sepiesh nga Eugenio Montale

Poezia është një ndër dashuritë dhe vokacionet më të medha, dhe pikërisht magjia e këtij libri më bëri të dashuroj poezinë.

Montale, një gjeni.

ObserverKult