Poezia e Ndue Ukajt “Tickets”, e përkthyer nga Vlora Konushevci, është nominuar nga Mad Swirl për Çmimin Pushcart, si një nga veprat më të mira të botuara nga revista gjatë vitit 2025.
Mad Swirl është një revistë letrare ndërkombëtare online, e fokusuar kryesisht në poezinë bashkëkohore dhe e njohur për procesin e saj shumë selektiv të përzgjedhjes.
Revista shqyrton mbi 1.000 poezi në vit dhe publikon vetëm një poezi në ditë, duke krijuar një hapësirë kuratoriale serioze për zëra poetikë nga e gjithë bota.
Përzgjedhja dhe nominimi nga Mad Swirl konsiderohen një vlerësim i rëndësishëm letrar, veçanërisht për faktin se ekziston një shoshitje redaktoriale e rreptë estetike.
“Jam thellësisht mirënjohëse për këtë vlerësim, për syrin e kujdesshëm redaktorial të Mad Swirl dhe për përkthimin e ndjeshëm e inteligjent që e përcolli poezinë në një gjuhë tjetër dhe në një hapësirë tjetër letrare”, thekson Ukaj.
Ndue Ukaj (1977, Kosovë) është shkrimtar dhe studiues i letërsisë. Ka botuar pesë libra me poezi, tri në prozë dhe dy libra me studime dhe kritikë letrare.
Ka fituar disa çmime, ndër to Çmimin Kombëtar për librin më të mirë me poezi të botuar në Kosovë në vitin 2010, çmimin për poezinë më të mirë në Festivalin Ndërkombëtar të Poezisë në Maqedoninë e Veriut “Ditët e Naimit” në vitin 2011, si dhe çmimin për shkrimtarin më të mirë në panairin e librit “Libri të ban mirë” në Shkodër, Shqipëri, në vitin 2025.
Krijimtaria e tij është përthyer dhe botuar edhe në antologji dhe revista të njohura ndërkombëtare.
ObserverKult
