Nga Çun Lajçi
Sot e shiqova gjatë atë foton e shfaqjes së fundit, n’rolin e sheh Rumiut; – me kaukun e verdhë! Me pallton e verdhë! Me tëspihet e verdhë, t’gjatë deri të gjunjët!
– Atë foton nga shfaqja e fundit si artist, me kornizën e madhe, që m’erdhi dhuratë nga ajo Zana regjizore, kur po përpiqesha me vdekë pak nga Covidi! Kur po përpiqesha me mbetë fotografi, i varun n’mur përgjithmonë, mes kornizave tua!
Gjatë e shiqova foton time sot! Ndrrova edhe pozicion, se rrezet e diellit thyheshin n’xhamin e pluhnosun e ma prishnin imazhin!
– Herë m’dukej se jam unë herë m’dukej se je ti. Madje m’dukej sikur ti po dilje nga sytë e mi e po vareshe n’vetullat e mia t’zbardhuna.
– Ç’don ti këtu? – sikur po me flisje!
– Ti s’ke varr si unë!
– Nuk t’viziton askush, mes gurëve të ftoftë!
– As korbi nuk krrokë mbi foton tande n’granit, si mbi foton time!
– Zbrit nga korniza!
– Nuk dua me t’pas afër meje.
– Akoma ka jetë n’ty, ani pse je i zbardhun, i rrudhun!
– Lëviz e mos u struk mureve si hije, se t’harrojnë siç m’harrove edhe ti mua!
– Dhe mos u kollit, se ikin nga ti!
– Mos pështyjë këlbaz se nuk t’afrohet njeri. Mbetësh vetëm dhe i vetmuem. I gjallë as i vdekun!
– Mos i prano shenjat e vdekjes; – kollën e këlbazën!
Dy herë u ula n’divanin që rri përfundi kornizës se fotografisë. I mbylla sytë për pak minuta e kur i çela i fola fotografisë sate; – je ti apo ndonji engjëll që rri tash e sa vjet n’mur e nuk flet!
Ndaç mos me beso, por u përlota. Madje e mora faculetën dhe i fshina faqet e laguna!
– Nuk dua me t’pa të lig, – sikur m’qortove.
– S’je plakë! Vetëm je zbardhë! Ke vu syze që të dukesh fisnik! Të rrin bukur mosha ty!
– Merre bastunin e dil mes njerëzish. Ec me temena! Le t’shohin, sa i bukur dukesh me moshën e bardhë!
– N’aktrim je unik! Je edhe ma shumë; – je legjendë që bartë mbi kurriz libra e kangë!
Kaq m’fole. U mbylle e buzëqeshun n’kornizë. Mua me mbetën gjurmët e gishtërinjëve n’pluhunin e xhamit. Lotët i fshina me faculetë e gjëmova!
– Bija ime! Sot e ndjeva se më kishte marrë malli me të takua. Me t’përqafë e me t’përqafë e mos mu ngi!
Ah! U banë shumë vite pa ty e shumë net pa gjumë!
N’ditën e pranverës të vitit 23
ObserverKult
Lexo edhe:
ÇUN LAJÇI REAGON ASHPËR PAS LAJMEVE PËR VDEKJEN E MIRUSH KABASHIT
Aktori ynë i njohur, Çun Lajçi, nëpërmjet një postimi në Facebook ka reaguar pas lajmit të rrejshëm që doli dje në disa media, dhe të cilat lajmëruan se aktori i njohur shqiptar, Mirush Kabashi ka ndërruar jetë.
Ky lajm u demantua nga të afërm të aktorit Kabashi. Duhet përmendur se kjo është hera e dytë që Mirush Kabashi shpallet i vdekur nga disa media.
Postimi i plotë i Çun Lajçit
Mirush!
Je Kabash ti dhe e dinë se banë gjithçka e çon randë, prandaj turrën si mizat n’m… e ta thërrasin vdekjen tash e dy herë, ca mjeranë që lekun e kanë babë e nanë!
Tekstin e plotë mund ta lexoni KËTU:
ObserverKult
