I.
nuk ka thuajse asnji muaj viti
që mëmëdheu nuk veshet n’zi
humbë diku udhëve të botës
kumtin e zisë theksojnë lajmet:
*trafikoi vajzën, rrëmbeu çikën
rrahu cucën, ngacmoi gocën
vrau gruan*
mbijnë lulegjaku
stinë e pa stinë.
II.
kur Nandori vjen
kuqet toka e qielli
kujtojnë veprimtaret
sikur të ishin kope delesh
jo si atë burrin e pushkës a penës
që në njëjës e lajnë në bronz, i thurrin lavdi
për gra, vajza, çika, cuca e goca
që dhanë jetë për vendin
ngritet memorial në shumës:
– Heroinat –
turma burrash në inaugurime
prejnë shirita të kuq
diku nji pllakatë përkujtimore shkruen:
– Dëshmoret e Kombit –
pa emna
përfshihen që të gjitha
në drita të Hyjneshës në Fron
udhëkryqeve të vendit
i ngujuen që t’gjitha në monumentin:
– Nana Shqipni –
dhe me kaq synojnë se përfundon
lavdia e grave.
III.
sa herë vjen Nandori
skuqemi nga e sotmja
kur ju thërrasim në emën:
Teutë,
Shotë,
Musine,
Parashqevi,
Savesti,
Urani,
Marie,
Nana Ajshe,
Lokja Zahide,
Adile,
Hyrie,
Ylfete,
Nurie,
dhe ti, Xhevë, që t’veshën në bronz
por ama *falë i qofsh* burrit
apo dhe ti, Yllkë, e vocërr në moshë
që e dite saktësisht se përse s’deshte përmendore
skutave të Shqipnisë ju kujtojnë
pllakave përkujtimore në shumës
pa emën
e na rrnojmë të sotmen për nesër
me shpresë të ndrojtun
që s’e kanë n’jet me ndryshu asgja.
IV.
Nandor i Kuq,
kush të ruejti n’pllamë të dorës
e na u ba himn me t’a dashtë lirinë
ardhmëri merr penë,
kurr s’asht vonë
nga akte të mbrojtuna t’botës së civilizueme
ashtu si vepruen vise të tjera
në mbrojtje të grave:
Vivandière, Lotta Svärd,
Fallschirmjäger, Oireachtas,
Ausiliari Femminile, Woman’s Auxiliary.
V.
na zhvesh nga të zezat
Nandor
mos i le n’hije
kujtoj me emën, thirri në emën
— mbaj frymë për frymë të gjalla
gratë e vendit tem —
ObserverKult
