Çun Lajçi: Kur thahen lisat e vdesin malësorët

Atij iu tha lisi iu rrëzuen vetullat
hiqjani plisin t’ia shohin rrashtën
si avullohen vitet
para se t’i këputën degët

S’i rrinë ma kaladashat n’shkjeka
shokën ia brejtën fluturat
murravlat sy ernash

Mos e vajtoni ate po krymbat
që do t’ia pijnë rrëshinën n’fysht

Merimangat ia hangrën stinët

Hiqjani plisin t’i sheh shqiponjat
si gaxhitën me vdekjën e tij
se i zgjatet rruga deri t’bie lisi n’tokë

N’mal s’bahemi t’gjithë malësorë tha
s’fluturojnë vetëm shqiponjat n’qiell
dhe u përqafua me hijën e vet.