poezi hajk –
Nga Mehmet Elezi
1.
Liria e porsaardhur u këqyr në pasqyrë
S’e njohu veten:
Më çoni në çmendinë!
2.
Në tregun ilegal të prostitutave
Çmimin më të kripur
Liria e ka
3.
Kjo verë me liri zgjedhjesh
Për të zgjedhur
Dimrin
4.
Të gjithë ecim
Vetëm mbërritja,
Ka mbetur te nisja
5.
Qoftëlargu kur s’ka punë, tredh koqet e veta
I gjetëm punë
Po i tredh tonat
6.
Sa më shumë vrapon me diellin mbas shpine
Aq më fort e shkel
Hijen tënde
7.
Nga ç’anë e natës doli ky përbindësh?
Atdheut i vari në qafë një gur varri
Dhe e shaloi
8.
E ardhmja?
Sa lehtë me e shitë
Sa vështirë me e ble!
9.
I urituri mjaftohet me një copë bukë
Nuk gëlltit
Copa të atdheut
9.
Biseda me prezervativë
Në ekrane
Që prostituojnë
10.
Gjithçka pa doganë në këtë port
Veç lirisë
Ajo ka doganë gjaku
11.
Flutura e nis krimb, e mbyll flutur
Njeriu e nis engjëll
Pse shpesh e mbyll djall?
12.
I lirë
U rrek me e thithë krejt ajrin për vete
I kopi mushkëria
13.
U shtuan kaq shpejt të pasurit
Varfëria u dëbua
Në hapësirat e shpirtit
14.
Për fushatë udhëheqësit
Te pazari i leshit zbritën
Konkurencë e ndershme leshi
15.
Ata pa varre, ata me varre
Brezat e humbur
Njësoj të humbur
16.
Ikën të trishtuar zogjtë
Syri i tyre sa një syth i blertë
Një lot sa oqeani mund të derdhë
17.
Era përgjak bërrylat
Në muret
E fshehta
19.
Prej padurimit
Me e shijue Lirinë
E përdhunoi
20.
Në Kosovë liria pi ujë gurre
Në këmbë i ka ende
Këpucët e luftës
21.
Edip orëlig, zezan i zi
Ther me thikë tënd atë, shtrin në shtrat tënd amë
Mbret nuk bëhesh dot
22.
Mure në banka, në ekrane, në rrezen e dritës
Në globin e lotit
Të fëmijës
23.
I lumi e i mjeri i ndershmi
Natën fle si ëngjëll
Ditën e këqyrin si shtrigan
24.
Në lotët e ngrirë të lumenjve
Flakëzat
E luleve të thanës
25.
Ndërmjet të shtunës së shkuar e të hënës që vjen
Fytyra e së dielës
Udhëkryq i bardhë
26.
Epidemi covid 19
Epidemi korrupsioni, lirie
Ikja nga Atdheu – epidemi gjaku
27.
Tha Sokrati: i ndershmi, prore fëmijë
Ç’mallkim për racën njerëzore
Politika s’ka vend për fëmijët
28.
Këto hapësira pa fund
Për kë i krijove, o Zot?
Për jetën pa fund mjafton një arkë dhé
29.
Doli nga portreti, rroi mjekrën
Do të jem thjesht Gjergj
U ngi Tirana me mjekra Skënderbeu
30.
Liria qe më e bukur si ëndërr
Ti je më e bukur
Se në ëndërr
ObserverKult
Lexo edhe:
