Sokrat Habilaj: Të kam mësuar keq…

23/12/2023 • 17:16

Sikur një ditë të doja të ikja larg,
Dhe të ishim të ndarë veç e veç,
E di se do më ndaloj si një merak,
Fakti që unë të kam mësuar keq.

Të kam mësuar kafen ta bëj vetë,
Tej filxhanit të më shohësh mua.
Fryma ime aty, me avujt e nxehtë,
Të përqafohen, si burrë e si grua.

Të kam mësuar kur je me të tjerë,
Nëse s’jam unë e shtyn gotën tutje.
Jo se pretë të të nxisë të pish verë,
Po do që në gotë të të lë një puthje.

Të kam mësuar, kur je nën çarçaf,
Të shtrihet krejt zbuluar kurmi yt.
Se e di do kesh dorën time në qafë,
E do të mbuloj sa të mbyllësh sytë.

Të kam mësuar që sa herë bie shi,
Çohem, hap dritaren pa më thënë.
Po pa thënë, nis që të kërkoj tek ti,
Pikat e shiut që në pore kanë rënë.

Mund të iki e nuk përmbyset bota,
Po si do bësh ti që të mësova keq?!
Ti qesh e tëra:- Një tjetër ndoshta,
Stop! Në djall ikja! Ndarja në dreq!

ObserverKult

Lexo edhe:

SOKRAT HABILAJ: DIKUR S’MUND TË ISHE AS ANKTHI IM…