Zhuliana Jorganxhi: Aroma jote më deh…

Një “ah!” iu del buzëve…
Më duket se vdes!
Ky çast brenda meje
një qind jetë ndez.

Oh, kjo fryma jote,
ngrohu një zjarr afshi,
rrotull qafës sime
bëhet shall mëndafshi!…

Kur më prek me ato duar,
ndez tek unë një zjarr të ri.
Koha ecjen ka ndaluar,
globi humb rrugën e tij.

Kokën time në trupin tënd
si çerdhe zogu sa herë e fsheh
në kraharor zemra s’gjen vend,
aroma jote vetëm më deh…

Sa herë nisesh për diku…
Ç’ka më mban zemra
ta them me sy.
Zemra ime bëhet zog
shtegton me ty, me ty…

1977

*Titulli i origjinalit: “Çaste dashurie”

LEXO EDHE: ZHULIANA JORGANXHI: ERDHE TI IKU MËRZIA