Ike dhe ti miku im, Petrit Ruka!
Ti këngë e madhe e kombit tim,
Ti frymë e bukur,
dashuri e paskaj.
Ike aq lehtë, ashtu siç erdhe,
Pa zhurmë, pa bujë.
Të mos zgjoje dhimbjen tonë,
E të pandehnim pastaj,
Se ende pjek vargje,
në këtë zheg Korriku,
Ike me hapin e flladit,
Të mos merrte vesh Vjosa.
E rrokulliste teposhtë
kërcunjte e zinj të gjëmës,
Mos merrnin vesh Horizontet
E tundnin “Shami të zeza qiellore”
O biri i këngës
Mos merrnin vesh malet
rrotull përmbi Turan.
E vithiseshin me ortekë dëshpërimi.
Fluturove poet, o bir i shtrenjtë i dheut
Tjetër gjë desha të këndoja sot për ty,
Por lajmi ma rrokullisi shpirtin pas lotit
E zemrën ma meke në pezulin e dhimbjes
Shkove për t’i dhënë kuptim ikjes,
Kur “këndej” më të ngushta bëhen rrugët,
Për “andej”: pa dyshim më të gjera
bëhen miku im.
Domosdo shtrove Universin me balada
Shpirt i dhe “Të pa-anës” me Lirika.
Kurmi yt i pakët pikoi si qiriu,
lëndën prej flladi, prej uji, prej drite.
Sa pak i more këtij Dheu,
Dhe një thesar, që s’çmohet ti i le.
O zot na fal vetëdijen!
Të njohim shenjtërinë e rrugës,
Me muzën e Petrit Rukës!
*Titulli i origjinalit: “Eh poet!”
ObserverKult
Lexo edhe:
VDIQ NË MOSHËN 67-VJEÇARE POETI I NJOHUR, PETRIT RUKA
Ndahet nga jeta në moshën 67-vjeçare poeti dhe kineasti i shquar, Petrit Ruka. Prej një viti Ruka vuante nga një sëmundje në zemër.
Lajmin për ndarjen e tij nga jeta e kanë dhënë të afërmit dhe miqtë e tij.
Ruka ka lindur në Tepelenë më 21.08.1954. Ai e ka theksuar shpesh ndikimin e fëmijërisë në poezinë e tij, duke na lënë hapësirë të përfytyrojmë fëmijën e zgjedhur nga poezia, atje në një fshat të Tepelenës, të zymtë, të ftohtë, gri nga gurët e shtëpive dhe të zi nga rrobat e grave.
Tekstin e plotë mund ta lexoni KËTU:
ObserverKult
