Ju ftojmë të lexoni një cikël poezish të Emin Z. Eminit, shkëputur nga libri i tij i fundit me poezi “Fjalë të bukëta”, Littera, 2022
VESHUN ME FUSTAN DJELLI
qjella eme
edhe hana u cokat n’drapën
në t’korrna të kallamoqit
mbas mesnat’s
andërr e preme re n’gropë t’oxhakut
të shpirtit t’em të mërdhimë
e erdhe e u dheze e u dogje
përreth verigut bollë prej tymnaje
u mb’shtolle
u çove
me rreptimë u ngjite
udhë qjellnash more
qjella eme u bane
në mjes
zhg’andërr u ktheve
e veshun me fustan djelli
FRYMË
kapedane
kur ma trupove arën e shpirtit
m’i shkune kallijtë e grunit
fmitë m’i le jetimë
të ’desin pa mue
unit
kaq fort fryve
frymë
RRAKAPOSHI I MALIT
kryet përmbi ré qjellnash
njaj mal
rrxue rrakaposh
ramun krejt i pashpirt
si qen besnik
para kpucëve t’tua bojëgjake
as u shemb termetit as vullkanit
as u përmbyt ujnash
po nga deti prej dritet
i syve t’drittë
shembtarja
nuk asht perendi pagane
asht vet’ kapedanja
GËSHTEJAT
për njata syt’ e tu të gështejtë
harrue në prush
kur natën bryma bjen
edhe blerimin e pëlcet
hala pa çel e zeza prandverë
për njata syt’ e tu t’gështejt’
harrue në gaca
kur mbi natën brymë bjen
digjen gemzat
nji zog dimni në vetullat e tua
cicron për ato dy gështeja
kapedane
BORËSHKRIMJA
dimën kje
ti m’ishe njajo bora e butë
prej dritet t’bardhë
qi m’i verbove të dy sytë
qefin ishe shtrue përmbi mue
rrshqita
unazat prej safiri bojëbruztë
para kambëve tua i këputa
paq poç kryet krisa
mbasandej m’tubove
24 cop’sh
me duert prej akulli t’zjermtë
kryet në prehnin t’and prarue
ma vnove
sa ma shumë qi të përqafova
e të deshta
ti shkove u shkive
kapedane
KALLXOM
ç’faj të paska rrezja e djellit
qi n’faqet e tua ngjyhet me t’kuqen e çelun t’kaçës
rritun me zor në therrishta
shiu ta paska inat
call se me rreptimë zhdyp qjell’s
bjen mbi flokun t’and prarue n’bojari
e pa të dvet’ me gishta t’ujtë
kaçurrelat t’i kreh
po lugun e qaf’s dëshprueshëm s’mundet me ta lag’
ç’mkat ba paska perëndija
pse hiç pa ia ‘da po e mallkon
tue e ditun se boll mue m’ka mallkue
tue m’lidhun shtashëpalëshokësh
për shtatin e shpirtin t’and
shtat e shpirt m’i ka shitue
e kurrnjiherë s’po m’len as frymë me marr’
m’ka zanue
pa t’dasht ty e eme xhehneme
ty pa t’dasht
kapedane moj kaçë
ObserverKult
Kliko edhe:
“FJALË TË BUKËTA” E EMIN Z. EMINIT, POEZI PËR PËRJETËSINË E NDJENJËS
“FJALË TË BUKËTA”, LIBRI I RI I EMIN Z. EMINIT, TASHMË NË LIBRARI
