Ju ftojmë të lexoni një cikël poezish të Emin Z. Eminit, shkëputur nga libri “Fjalë të bukëta”, Littera, 2022
BALADË PËR KAPEDANEN DHE GRATË E TJERA TË BOTËS
qe besa t’kam pas’ thanë
kur m’pate dvet’ njat’herë motit
ti je kapedanja
po besë
e di mirë
nuk m’pate xan
qe pse fjalët e mia nuk i qes në lumë
fijeve t’flokut t’and
t’grunta
kokrrat e buk’s ua kam shkun’
nji nga nji thur i kam çerdhe
fijet prej rrezje
bashkë rritun zogjtë krah’pupluem
qjell’s ia falëm
s’ka qysh mos me t’u kujtue
njajo cicërimë dhimte e dashnije
kur brofen të ajrët mbas lirije
bash si njajo brufullima jote
qi t’pikte buzësh prej dredhzash t’egra
“me t’than’ t’due, pak asht”
s’ka dert nëse tash veç e ke shti n’dhé
melodinë e malltë muranë ba e ke
prandverën e kenjes prej burri
n’pik’ t’dimnit
mugullue e ka djelli i syve të tu
thanat gjethrame
në kodrën e vorrit t’nuses
m’janë dëshmitare
nëse veç harrue i ke netët e bruzta
kur hangshim mollë nër dritë të hanës
ti e din
para se drandofille me çel n’mue
oxhaku i kull’s t’eme
rrxuemun ka ken
me gacat e shpirtit qi n’shuplakë t’dorës m’i lshove
ia qita tymin e flakën
xhezvet binake në prush shti i kam
kafet e mjesit m’i pjekë
mba’ mend
kur pahiri e bane faqen e shegtë
me pshtymë t’oxhakut
zo’ sa shumë patëm keshë
njat’ dit’ m’the
krahun t’and kulm e kam
eh e zjarrmta eme
tjetra gjithsecila ajo të tana kapedane janë
se kanë diçka prej kenjesh t’kapedanevet
dhe unë i tyne jam kur digjen e mërdhihen
në netët e mallta
jam ai tjetri
brijshpuemuni
poeti
KAPEDANE GRUE
kapedane
krahasue t’kam me t’tana llojet e luleve
me hanën pesëm’dhetë
me rrezet e djellit prarue
me tallazet e tërbueme t’oqeanevet
me pemët
me qafëg’jatën mjellmën
me zogëzfushën mllenjën
me shtegtaren turtulleshën
me grabitçoren sokoleshën
me stinët me qjellën
kurrqysh s’muj harroj
kur mace n’krahnuer m’ke mjaullue
bukël n’pojatë m’ke hukatë
kaprolle malevet m’ke ikë
sirenë ujnavet m’ke përmbytë
kjoftlargte perëndesh’
mjaltë mickojë mordje melhem
atdhe
për mue ke ken
po çka jo se
haj tybe nuk ka emën qi ngjit s’ta kam
e ra s’ka taman
kur ra e m’xani e vona
vesh e mora
kish pas mjaftue
me t’than’
call
g r u e
MERRMA KRYET
pse n’pik’ t’ditës
tinëz ma fik fitilin e syve t’zez’
e i vran vetullat katran
pse n’mesnatë m’ja qet priten
lumit buzëshkrumuem për nji pikë ujë
e ik nëpër retë e terrueme t’qjelles
pse po më mba’ pezull
e jetën futë ma ban
qe ku jam
merrma kryet
kapedane
ZHGJANDËRR
frymë
emnin ta kam pas ngjitë
po mallkim e mkat
për mue paske ken
edhe kur njaj gjumë deket m’xen
zhgjandërr në andërr më vjen
kapedane
TË DUE
nga dor’shkrim’ i djegun
n’mangallin e shpirtit t’em
germat e emnit t’and i gjeta
t’shkrumueme
kapedane
t’shkumueme
të mbulueme me hi
ruejtun call gacat e mallta të titullit
të due
ObserverKult
Lexo edhe:
EMIN Z. EMINI: DUA TA ZGJEROJ KOZMOSIN AQ SA TA ZËRË DASHURINË TIME
PROMOVIMI I LIBRIT “FJALË TË BUKËTA” TË EMIN Z. EMINIT (FESTIVALI POETIK I PRISHTINËS)…
LIBRI I EMIN Z.EMINIT “FJALË TË BUKËTA” , POEZI PËR PËRJETËSINË E NDJENJËS
