Donika Dabishevci: E gjithmonshmja dashni
Nji hap para veç e kish,
kur u rrëzue si shkamb i bashëm shtatrandë
dhe e puthi tokën.
Nji lulebozhure iu qëndis mjedis shpatullash,
lulebozhure ujitun me vrushkuj t’nxehtë gjaku.
Dritë e hanës përthyhet n’t’kuqen e ndezun.
Llamburit fort!
S’don me ju zanë besë syve, ajo.
M’u qorrofshin të dytë, thotë,
teksa ndihet edhe krisma tjetër.
Dhimta tmerrësisht therrëse s’e ndali.
Kambadoras e marramendun
rropatet mjedis plumbash
drejt trupit t’dashtunit
tuj zvarritë.
Lotët i rrëshqasin si gur n’rrënoja
t’nji kështjelle të shkatrrueme…
Tre hapa sa tre shekuj!
U plandos mbi trup t’tij
ngrimun si mermer,
e përqafoi çehrebardhin
shikim mbetun drejt qiellit,
iu lëbyrën sytë,
iu terratis gjithçka
… dhe vdiq!
Trotuari u kuqlue.
U la n’gjak.
Ish e diel e tyre e fundit,
vrapim i fundit,
përqafim i fundit, ish!
Asht dashnia ajo
që s’e ndalin
as plumbat,
as ploja,
as kurthet,
as pritat
as çmendunia
as absurditeti i luftës.
E përjetshmja.
E përtejshmja.
E gjithmonshmja.
Admira Ismiç dhe Bosko Brkiç edhe pse ishin të pajisur me lejekalim u qëlluan prej snajperësh më 19 maj 1993 teksa po e kalonin Urën Vrbanja në Sarajevë, zonë kjo neutrale në atë kohë.
Bosko u qëllua i pari e fill pas tij Admira, e cila frymën e fundit e ruajti për me mbërri te trupi i të dashurit e me i mbyllë sytë mbi të.
T’dashuruarit që vdiqën t’përqafuar njihen tashmë si Romeo dhe Zhulieta e Bosnjës.
Poezia është pjesë e librit të Donika Dabishevcit “E gjithkohshmja Andërr”, Littera, 2024, Prishtinë, që i kushtohet në tërësi viktimave të luftës
ObserverKult
Lexo edhe:
Kliko recensione për këtë libër:
- GËZIM ALIU: “E GJITHKOHSHMJA ANDËRR”, POEMË PËR NJERIUN NË LUFTË
2. AFRIM DEMIRI: “E GJITHKOHSHMJA ANDËRR”/ POETIKA E VRAME NGA LUFTA
3. E PËRKOHSHMJA DHE E GJITHKOHSHMJA SI ANTITEZË DHE AMBIVALENCË NË POETIKËN E DONIKA DABISHEVCIT
4. BAJRAM MJEKU: “E GJITHKOHSHMJA ANDËRR” – MONUMENT INDIVIDUAL PËR DRAMËN KOLEKTIVE
5. Maxhun Osmanaj: Një metaforë në mes jetës dhe vdekjes
6. BISLIM AHMETAJ: DASHURIA DHE VDEKJA NË POEZINË E DONIKA DABISHEVCIT
7. AGIM BAÇI: VALLJA E FJALËVE TË DHIMBJES TE “E GJITHKOHSHMJA ANDËRR”
8. MËRGIM BEKTESHI: “E GJITHKOHSHMJA ANDËRR”, KUJTESË HISTORIKE NË VARGJE
9.Kujtim Morina: Përsiatje pas leximit të librit me poezi të Donika Dabishevcit, “E gjithkohshmja andërr”
10. SHEFQETE GOSALCI: “E GJITHKOHSHMJA ANDËRR”, LIBËR I VEÇANTË I NJË POETEJE ELITARE
11. AGRON GËRGURI: “E GJITHKOHSHMJA ANDËRR”, LIBËR QË DUHET DRAMATIZUAR PËR T’I DHËNË VULË KUJTESËS!
12. TIMO MËRKURI: IKJA SI TRIUMF I JETËS NË POEZINË “TUJ IKË DEKËS” E DONIKA DABISHEVCIT
13:DRITA FEJZA: “E GJITHKOHSHMJA ANDËRR”, LIBËR QË RUAN KUJTESËN HISTORIKE DHE NDERON VIKTIMAT E LUFTËS!
14. DRITA FEJZA: POEZIA “DREJT PUSHKATIMIT” E D.DABISHEVCIT, REFLEKTIM I THELLË MBI JETËN, VDEKJEN E DINJITETIN NJERËZOR!
